CoMet 2.0 ᐅᑭᐅᖅᑕᖅᑐᖅ

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓄᓇᕐᔪᐊᕐᒥ ᐃᓅᖃᑎᒌᖑᔪᓄᑦ ᐊᒃᓱᕈᕈᑎᒋᔭᐅᕗᖅ ᐱᓕᕆᔭᐅᓪᓗᓂ ᐊᕐᕌᒍᖏᑦ 2100-ᖏᓐᓄᐊᓕᖅᑎᓪᓗᒋᑦ.  ᐱᔾᔪᑎᒋᓪᓗᐊᑕᖅᑕᖓ ᓯᓚᕐᔪᐊᑉ ᐅᖅᑰᓯᕙᓪᓕᐊᓂᖓ ᐃᓯᐊᕿᓂᑦ ᐳᔪᕐᓗᓂᑦ ᓄᓇᕐᔪᐊᕐᒥᓐᖔᖅᑐᓂᑦ.  ᒪᕐᕉᒃ ᐱᒻᒪᕆᐅᓂᖅᐹᖑᔪᑦ ᓄᓇᕐᔪᐊᕐᒥᐅᑕᔪᑦ ᐱᓕᕆᓂᖓᓐᓄᑦ ᓴᖅᑭᓯᒪᕗᑦ ᐊᓂᐊᕋᖅᑐᓂᒃ ᐃᓯᐊᕿᒥᑦ carbon dioxide (CO2)  ᐊᒻᒪ  ᐳᓪᓚᒃ methane (CH4). ᑭᓯᐊᓂᓕ ᓴᓇᔭᐅᔪᓄᑐᐊᖑᖏᑦᑐᖅ ᑕᐃᒪᐃᑦᑐᖅ ᓄᓇᕐᔪᐊᕐᒥ ᐱᓪᓗᒍ ᓄᓇᐃᑦ ᒪᓴᐃᑦ ᐊᒻᒪ ᐅᑭᐅᖅᑕᖅᑐᕐᒦᑦᑐᑦ ᐱᕈᖅᑐᑦ ᐱᒻᒪᕿᐅᖕᒪᑕ.  ᑕᒪᒃᑯᐊ ᒪᓴᖕᒥ ᐱᕈᖅᑐᑦ ᐃᓯᐊᕿᑎᑦᑎᖕᒪᑕ ᐳᓪᓚᓂᒃ ᐱᕈᖅᑐᖏᑦ ᐊᒻᒪ ᑐᖁᓕᓕᖅᑎᓪᓗᒋᑦ ᐳᓪᓚᖏᓐᓂᒃ ᐊᓂᐊᕆᕙᒃᑐᑦ ᑕᐃᔭᐅᔪᒥᒃ CO2 ᐊᒻᒪ CH4. ᑕᒪᒃᑯᐊ ᐱᕈᖅᑐᑦ ᑐᖁᓕᓕᖅᑎᓪᓗᒋᑦ ᐊᐅᓚᓂᕆᔭᖏᑦ ᓄᓇᕐᔪᐊᕐᒥ ᐃᒪᖅᓱᖕᓂ ᐱᕈᖅᑐᑦ ᐱᒻᒪᕆᐅᓂᖅᐹᖑᓪᓗᑎᒃ ᑭᓯᐊᓂᓕ ᑐᒃᑭᓯᐅᒪᔭᐅᑦᑎᐊᖏᑦᑐᑦ ᐊᒻᒪ ᓇᒧᓐᖓᐅᖕᒪᖔᑕ ᐳᓪᓚᐃᑦ ᐊᓂᐊᕋᖅᑐᑦ ᐊᒻᒪ CO2-ᓕᕆᓂᕐᒧᑦ ᐊᑐᕈᒫᖅᑕᖏᑦ ᑮᓇᐅᔭᑦ.. ᖃᐅᔨᒪᔭᐅᓂᕆᔭᖓ ᓴᖅᑭᑉᐸᓪᓕᐊᓂᕆᕙᒃᑕᖏᑦ ᑕᒪᒃᑯᐊ ᐊᓂᐊᕋᖅᐸᒃᑐᑦ ᓯᓚᒧᑦ ᐊᖏᔪᒻᒪᕆᖕᒪᑕ ᐃᓯᐊᕿᓂᓐᖔᖅᑐᑦ ᐳᔪᕐᓗᖕᓂᑦ, ᐊᒻᒪ ᐊᐅᓚᓂᕆᔭᖏᑦ ᑐᑭᓯᒪᔭᐅᑦᑎᐊᕋᑎᒃ ᖃᐅᔨᓴᖅᑎᒻᒪᕆᐅᔪᓄᑦ ᐊᑐᐊᒐᓕᐅᖅᑎᓄᓪᓗ ᑕᒪᓐᓇ ᑭᐅᔭᐅᑦᑎᐊᕆᐊᓕᒃ ᓱᖅᑯᐃᔭᒪᐅᖏᓐᓂᖓᓄᑦ ᒥᒃᓴᐅᓴᖑᓐᓇᖅᓯᓂᐊᕐᒪᑕ ᖃᓄᐃᓐᓂᐊᕐᒪᖔᑦ ᓯᓚ ᐅᖅᑰᓯᕙᓪᓕᐊᑎᓪᓗᒍ.

ᐆᒃᑐᕋᖅᑕᐅᓂᖏᑦ ᖃᓄᑎᒌᕐᒪᖔᑕ ᐊᓂᐊᕋᖅᑐᑦ ᐳᓪᒪᐃᑦ ᓯᓚᒧᓐᖓᐅᔪᑦ ᖃᐅᔨᓴᖅᑕᐅᔭᕆᐊᖃᕐᒪᑕ ᑲᒪᒋᔭᐅᔪᓐᓇᖁᓪᓗᒍ ᑕᒪᓐᓇ ᑖᒃᑯᐊ ᐱᓕᕆᔭᐅᑎᓪᓗᒋᑦ CoMet 2.0 ᐅᑭᐅᖅᑕᖅᑐᕐᒥᒃ ᑕᐃᔭᐅᔪᖅ, ᐱᓕᕆᐊᖃᕈᒪᕗᒍᑦ ᖃᐅᔨᓴᐃᓗᑕ ᖃᖓᑦᑕᖅᑎᑕᐅᓯᒪᔪᒥᒃ ᐊᑐᕐᓗᑕ ᐊᐅᓚᑕᐅᔪᓐᓇᕐᓗᓂ ᖃᐅᔨᓴᐃᓗᓂ ᐃᓯᐊᕿᓂᒃ ᐳᓪᓚᓂᒡᓗ ᐊᓂᐊᕋᖅᑐᖃᕐᒪᖔᑦ ᓯᓚᒧᓐᖓᐅᔪᓂᒃ.

CoMet 2.0 ᐅᑭᐅᖅᑕᖅᑐᖅ ᑕᐃᔭᐅᔪᖅ ᐱᓕᕆᐊᖑᔪᖅ ᓄᓇᕐᔪᐊᕐᒥ ᖃᐅᔨᓴᐃᓪᓗᑎᒃ ᐱᓕᕆᔭᐅᔪᖅ ᓯᕗᓕᖅᑎᖃᖅᑐᑦ ᔮᒪᓂᕐᒥᐅᑦ ᓯᓚᓕᕆᔨᖏᓐᓂᒃ – DLR, ᔮᒪᓂᒃᑯᑦ ᒐᕙᒪᖏᑕ ᐱᓕᕆᕕᖓᑦ, ᐊᒻᒪ ᔮᒪᓂᒃᑯᑦ ᖃᔨᐅᓴᐃᔾᔪᑎᖓᓐᓂᒃ ᖃᖓᑦᑕᖅᑎᑕᐅᕙᒃᑐᒥᒃ ᐊᑐᕐᓂᐊᖅᑐᑦ HALO (ᖁᑦᑎᓈᕈᓐᓇᖅᑐᖅ ᐊᒻᒪ ᐅᖓᓯᒃᑐᒧᐊᕈᓐᓇᖅᑐᖅ), ᓴᓇᔭᐅᒃᑲᓐᓂᖅᓯᒪᓪᓗᓂ ᐋᖅᑭᒋᐊᖅᑕᐅᓯᒪᔪᖅ Gulfstream G550.

ᑖᓐᓇ ᐱᓇᓱᐊᕈᓯᕐᓄᑦ ᐊᕐᕕᓂᓕᖕᓄᑦ ᐱᓕᕆᔭᐅᓂᐊᖅᑐᖅ ᖃᐅᔨᓴᐃᓗᑎᒃ ᐋᒡᒌᓯ 6-ᒥᑦ ᓯᑎᐱᕆ 16, 2022 ᑎᑭᓪᓗᒍ ᑐᑦᑕᕐᕕᖃᕐᓗᑎᒃ ᐃᐊᓐᒪᓐᑕᓐ ᐃᐅᓪᐳᑕᒥᒃ.  ᖃᓂᒋᔭᖓᓂ 120- ᖃᖓᑕᓗᓂ ᐃᑲᕐᕋᐃᑦ ᐊᑐᐃᓐᓇᐅᓂᐊᖅᑐᑦ ᑮᓇᐅᔭᖃᖅᑎᑕᐅᓪᓗᑎᒃ ᑕᖅᑲᒃᑯᓇᓐᖓᑦ ᐊᒻᒪ ᐅᓄᑲᓪᓚᒃᑐᓂᒃ ᓄᓇᖅᑲᑎᒌᖏᑦᑐᓂ ᑲᓇᑕᑉ ᐊᒡᒍᖅᑐᖅᓯᒪᓂᖏᓐᓂ ᐊᒻᒪ ᐅᑭᐅᖅᑕᖅᑐᕐᒥᐅᓂ ᓂᖓᑦᑕᖅᑎᑕᐅᖃᑦᑕᕐᓂᐊᖅᑐᑦ.  ᐅᓄᖏᑦᑑᒐᓗᐊᑦ ᖃᖓᑕᑎᑕᐅᐃᔪᑦ ᓄᓇᕗᒧᐊᖃᑦᑕᕐᓂᐊᖅᑐᑦ.  ᐊᒃᑐᐃᓂᖃᓗᐊᕐᓂᐊᖏᑦᑐᖅ ᓯᓚᒥᒃ, ᐆᒪᔪᓂᒃ ᐊᒻᒪ ᐃᓄᖕᓂᒃ. ᖃᖓᑕᑎᑕᐅᖃᑦᑕᕐᓂᐊᖅᑐᑦ ᖁᑦᑎᓈᖅᑎᑕᐅᓗᑎᒃ ᑭᓛᒥᑐᔅᓂᒃ ᐅᓄᖅᑐᓂᒃ.  ᐃᓛᓐᓂᓚᐅᓱᖓᒃᑯᑦ ᓄᓇᒧᑦ ᐊᑦᑎᓈᖃᑦᑕᑉᕐᓂᐊᖅᑐᑦ ᑭᓯᐊᓂᓕ ᓴᐳᒻᒥᐅᓯᖅᑕᐅᓯᒪᔪᓄᐊᕐᓂᐊᖏᑦᑐᑦ.  ᐃᑲᔪᖅᑕᐅᖁᓪᓗᒋᑦ ᐊᑐᖅᑕᐅᔪᑦ ᓴᓇᕐᕈᑎᕗᑦ, ᐅᓄᖏᑦᑑᒐᓗᐊᓂᒃ ᓯᓚᓐᓂᐊᕈᑎᓂᒃ ᖃᖓᑦᑕᖅᑎᑦᑎᖃᑦᑕᕐᓂᐊᖅᑐᑦ ᐊᒻᒪ ᐱᔭᐅᖃᑦᑕᕐᓗᑎᒃ ᐅᑎᖅᑎᑕᐅᓗᑎᒃ. ᑖᒃᑯᐊ ᐊᔾᔨᒋᔭᖏᑦ ᖃᖓᑦᑕᖅᑎᑕᐅᕙᒃᑐᑦ ᓯᓚᓐᓂᐊᖅᑎᒃᑯᓐᓄᑦ ᐳᕕᔫᕐᔪᐊᑦ 60-ᖏᖅᓱᖅᑕᐅᓪᓗᑎᒃ ᖃᖓᑦᑕᖅᑎᑕᐅᕙᒃᑐᑦ ᐅᓪᓗᑕᒫᓐ ᑲᓇᑕᓕᒫᒥ ᐊᒻᒪ ᐅᓗᕆᐊᓇᖅᑐᓂᒃ ᐃᓗᓕᖃᕐᓂᐊᖏᑦᑐᑦ ᖃᖓᑦᑕᖅᑎᑕᐅᖃᑦᑕᖅᑐᑦ.

ᑖᓐᓇ ᐱᓕᕆᐊᖑᔪᖅ CoMet 2.0 ᐅᑭᐅᖅᑕᖅᑐᖅ ᖃᐅᔨᓴᐃᔪᑦ ᒪᑐᐃᖓᓪᓗᓂ ᐱᓕᕆᔭᐅᔪᖅ ᐱᔨᑦᓯᖅᑕᐅᓪᓗᑎᒃ ᓄᓇᕐᔪᐊᕐᒥ ᓄᓇᖃᖅᑐᑦ.  ᐱᔾᔪᑎᒋᓪᓗᒍ ᑭᓇᒃᑯᑐᐃᓐᓇᕐᓄᑦ ᑮᓇᐅᔭᖃᖅᑎᑕᐅᓪᓗᓂ ᐱᓕᕆᐊᖑᓂᖓᓄᑦ, ᐃᓘᓐᓇᖏᑦ ᑐᓴᒐᒃᓴᑦ ᓄᐊᑕᐅᔪᑦ ᑕᖅᑲᒃᑯᓄᖓ ᓴᖅᑭᑕᐅᕙᒃᑐᑦ.  ᑕᓐᓇ ᐱᔾᔪᑎᒋᓪᓗᒍ HALO ᖃᐅᔨᓴᖅᑕᐅᔪᓂᑦ ᑐᓴᒐᒃᓴᑦ ᓄᐊᑕᐅᓯᒪᔪᑦ ᐱᑕᖃᖅᐳᑦ ᐃᓕᐅᖅᑲᐃᕕᔪᓐᓇᕐᓂᐊᖅᑐᑦ ᖃᕆᑕᐅᔭᖅ ᐊᒻᒪᓗ ᐊᓯᖏᑦ ᖃᕆᑕᐅᔭᒃᑯᑦ ᑐᖅᑯᐃᕕᐅᔪᑦ ᐅᑭᐅᖅᑕᖅᑐᕐᒥ ᖃᐅᔨᓴᐃᕕᐅᔪᓂᑦ ᑐᖅᑯᖅᑕᐅᔪᓐᓇᕐᓂᐊᕐᒥᔪᑦ.  ᐅᓂᒃᑳᓕᐅᕈᓐᓇᑦᑎᐊᖅᐳᒍᑦ ᖃᐅᔨᓴᐃᓂᑦᑕ ᒥᒃᓵᓄᑦ ᑕᖅᑲᒃᑯᓄᖓ ᐊᒻᒪ ᑐᓐᖓᓱᒃᑎᑦᑎᒐᔭᖅᐳᒍᑦ ᓄᓇᖃᖅᑳᖅᓯᓚᔪᓂᑦ ᐅᑭᐅᖅᑕᖅᑐᕐᒥᐅᑕᐅᒧᓂᓪᓗ ᓄᓇᓕᖕᓂᑦ ᓂᓪᓕᕐᕕᐅᒃᐸᑕ ᑐᓴᕈᒪᓂᖃᖅᑐᓂᒃ ᖃᐅᔨᓴᐃᓂᕐᒥᒃ ᐊᒻᒪ ᑭᓱᓂᒃ ᓯᕗᓪᓕᐅᔾᔨᓯᒪᖕᒪᖔᑕ ᖃᐅᔨᓴᖅᑕᐅᔭᕆᐊᖃᖅᑐᓂᒃ ᑐᓴᕐᕕᒋᔪᒪᕙᕗᑦ.